*हवेचा दाब वाढल्याने तापमानात घट; बीडसह मराठवाड्यात पावसाची शक्यता आणि मान्सूनसाठी अनुकूल स्थिती*
अंबाजोगाई- प्रतिनिधी:–
महाराष्ट्रावर हवेचा दाब वाढल्यामुळे आणि ढगाळ हवामानामुळे राज्यातील कमाल व किमान तापमानात घट होण्यास सुरुवात झाली आहे. आज, रविवारी २४ मे रोजी राज्यावरील हवेचा दाब १०१० हेप्टापास्कल इतका वाढला असून, यामुळे नागरिकांना कडक उन्हापासून काहीसा दिलासा मिळाला आहे. हवामान विभागाने दिलेल्या माहितीनुसार, या आठवड्यात हवेच्या दाबातील बदलांमुळे तापमानात घट कायम राहणार आहे. विशेष म्हणजे ही स्थिती मान्सूनच्या आगमनासाठी अत्यंत पूरक ठरत असून, मान्सून वेगाने पुढे सरकण्याची दाट शक्यता निर्माण झाली आहे. सध्या मान्सूनने अंदमान समुद्र आणि श्रीलंकेचा अर्धा भाग व्यापला असून अरबी समुद्रातील अनुकूल बदलांमुळे तो निर्धारित वेळेपूर्वीच दाखल होऊ शकतो. प्रशांत महासागरात ‘एल निनो’चा प्रभाव अद्याप सुरू झालेला नसल्याने यंदाच्या मान्सूनवर त्याचे कोणतेही संकट नाही.
या हवामान बदलांचा थेट परिणाम मराठवाड्यावर होत असून बीड, धाराशिव, लातूर आणि परभणी जिल्ह्यांत आज ५ ते १० मिलिमीटर पावसाची शक्यता वर्तवण्यात आली आहे. बीड जिल्ह्यात आज वायव्य दिशेकडून ताशी १९ ते २३ किलोमीटर वेगाने वारे वाहतील, तर आकाश अंशतः ढगाळ राहील. बीडमध्ये आज कमाल तापमान ३९ अंश सेल्सिअस आणि किमान तापमान २७ अंश सेल्सिअस राहण्याचा अंदाज आहे. दुपारच्या वेळी बीडमध्ये सापेक्ष आर्द्रता ३१ ते ३५ टक्के राहण्याची शक्यता असल्याने हवेत काहीसा दमटपणा जाणवेल. संपूर्ण मराठवाड्यात नांदेड जिल्ह्यात सर्वाधिक ४१ अंश सेल्सिअस तापमानाची नोंद होऊ शकते, तर धाराशिवमध्ये तापमान ३७ अंशांपर्यंत खाली येईल. कोकण किनारपट्टीवर नैर्ऋत्येकडून वारे वाहू लागल्याने तिथे मान्सूनपूर्व पावसासाठी पोषक वातावरण तयार झाले आहे.
