परळीत थार गाडीची धडक की जीवघेणा हल्ला?
देशमुख यांची प्रकृती चिंताजनक;थार गाडीचा थरार सीसीटीव्हीत कैद.
बीड (प्रतिनिधी)परळी वैजनाथ येथे एका धक्कादायक घटनेने परळी शहर पुन्हा हादरले.प्रशांत प्रल्हाद देशमुख हें दुचाकीवरून जात असताना यांना थार गाडीने संत भगवान बाबा चौक ते तहसील कडे जाणाऱ्या रस्त्यावर धडक देऊन चालक घटनास्थळावरून पळून गेल्याची गंभीर घटना समोर आली आहे. या घटनेत प्रशांत देशमुख गंभीर जखमी झाले असून त्यांच्यावर अंबाजोगाई येथील रुग्णालयात उपचार सुरू असल्याची माहिती मिळाली आहे.
या प्रकरणामुळे परिसरात संतापाची लाट उसळली असून देशमुख कुटुंबीयांनी हा केवळ अपघात नसून जाणीवपूर्वक जीवे मारण्याचा प्रयत्न असल्याचा आरोप केला आहे. विशेष म्हणजे परिसरातील सीसीटीव्ही फुटेजमध्ये संबंधित थार गाडी स्पष्टपणे दिसत असल्याचा दावा करण्यात आला आहे.
देशमुख कुटुंबीयांच्या म्हणण्यानुसार, फुटेजमध्ये चारचाकी वाहन चालकाने संशयास्पद पद्धतीने मागून गाडी आणून धडक दिल्याचे दिसत असून या घटनेची सखोल चौकशी करून कठोर कारवाई करण्याची मागणी करण्यात आली आहे. मागील काही महिन्यापासून शांत असलेली परळी पुन्हा एकदा या जीवघेण्या हल्ल्यामुळे चर्चेत आली आहे.
दरम्यान, या घटनेप्रकरणी पोलिसांकडे तक्रार दाखल करण्याची प्रक्रिया सुरू असून संबंधित वाहन चालकाचा शोध घेण्यासाठी पोलीस यंत्रणा कामाला लागल्याचे सांगितले जात आहे.
“सीसीटीव्ही फुटेज उपलब्ध असताना आरोपीला तात्काळ अटक करून त्याच्यावर खुनाच्या प्रयत्नाचा गुन्हा दाखल करावा,” अशी जोरदार मागणी देशमुख कुटुंबीयांसह नागरिकांकडून होत आहे.
या प्रकरणाचा तपास पोलिसांकडून सुरू असून पुढील कारवाईकडे संपूर्ण परळीकरांचे लक्ष लागले आहे. मात्र या घातपाताच्या घटनेमुळे परळी शहर पुन्हा हादरले आहे.
