*आजपासून राज्यात नवीन रिक्षा परवान्यांवर बंदी!*
मुंबई: राज्यातील वाढती वाहतूक कोंडी आणि शहरी प्रदूषणावर नियंत्रण मिळवण्यासाठी राज्य सरकारने आज, ९ मार्चपासून नवीन ऑटो रिक्षा परवाने देण्यास तात्पुरती स्थगिती दिली आहे. परिवहन मंत्री प्रताप सरनाईक यांनी या महत्त्वपूर्ण निर्णयाची घोषणा करताना स्पष्ट केले की, मुंबईसह मोठ्या शहरांमध्ये रिक्षांच्या वाढत्या संख्येमुळे वाहतूक व्यवस्थेवर मोठा ताण येत आहे. मंत्रिमंडळाच्या सविस्तर चर्चेनंतर आणि नवीन नियमावली अर्थात ‘एसओपी’ तयार झाल्यानंतरच परवाने देण्याबाबत पुढील निर्णय घेतला जाईल. केंद्र सरकारच्या रस्ते वाहतूक मंत्रालयाने दिलेल्या सल्ल्यानुसार, मोटार वाहन दुरुस्ती अधिनियम २०१९ अंतर्गत राज्य सरकारला स्थानिक परिस्थितीनुसार वाहतुकीचे नियमन करण्याचे अधिकार प्राप्त आहेत. सध्या राज्यात सुमारे १४ लाख रिक्षा परवाने असून, परवाना वाटप प्रक्रियेत पारदर्शकता आणणे आणि अवैध परवान्यांच्या तक्रारींचे निवारण करणे हा या निर्णयामागचा मुख्य उद्देश आहे. ५ लाखांपेक्षा जास्त लोकसंख्या असलेल्या शहरांमधील वाहतूक सुरळीत करण्यासाठी लवकरच नवीन सर्वसमावेशक धोरण आखले जाणार आहे.
