मुलीची छेड काढणाऱ्यास जाब विचारल्याने चाकूने वार.

बीड (प्रतिनिधी)बीड शहरातील माळे गल्लीत राहणारे शाम पुरुषोत्तम जमदाडे वय 49 वर्ष यांच्यावर चाकूने हल्ला करून तिघांनी बेदम मारहाण करण्यात आल्याची धक्कादायक घटना मंगळवारी (दि. 17 फेब्रुवारी) दुपारी चार वाजण्याच्या सुमारास बलभीम कॉलेज ते मिल्या कॉलेज या गल्लीदरम्यान घडली.या घटनेमुळे शहरात एकच खळबळ उडाली आहे.

प्राथमिक मिळालेल्या माहितीनुसार,जमदाडे यांच्या मुलीला परिसरातील एका तरुणाकडून वारंवार फोन करून त्रास दिला जात होता. यापूर्वीही काही महिन्यांपूर्वी संबंधित तरुणाविरोधात शहर पोलीस ठाण्यात तक्रार देण्यात आली होती. मात्र ते प्रकरण समेटाने मिटविण्यात आल्याचे सांगितले जाते. तरीदेखील संबंधित तरुणाने पुन्हा मुलीला त्रास देणे सुरूच ठेवले होते.

या पार्श्वभूमीवर शाम पुरुषोत्तम जमदाडे यांनी त्या तरुणाला जाब विचारला असता,त्याने जमदाडे यांच्यावर चाकूने वार करून मारहाण केली. या हल्ल्यात जमदाडे गंभीर जखमी झाले असून त्यांच्यावर सध्या बीडच्या शासकीय रुग्णालयात उपचार सुरू आहेत.

घटनेची माहिती मिळताच पोलीस घटनास्थळी दाखल झाले असून पुढील तपास सुरू आहे. संबंधित आरोपीचा शोध सुरू असल्याची माहिती सूत्रांकडून मिळाली आहे.

दरम्यान, बीड शहरात वाढत्या हाणामारी, खून व गंभीर गुन्ह्यांच्या घटनांमुळे कायदा व सुव्यवस्थेचा प्रश्न ऐरणीवर आला आहे. पोलीस प्रशासनाचा धाक कमी झाल्यानेच अशा प्रकारच्या घटना वाढत असल्याची चर्चा नागरिकांमध्ये सुरू असून, शहरात कायदा सुव्यवस्था राखण्यासाठी अशा गुंडांची बीड शहरात धिंड काढावी. तसेच अशा घटना रोखण्यासाठी पोलिसांकडून कठोर पावले उचलण्याची मागणी नागरिकांतून होत आहे.